मिस धनकुटा २०१९ को अडिसनबाट ४० युवती छनोट

धनकुटा/  धनकुटामै पहिलो पटक सौन्दर्य प्रतियोगीताका लागि आयोजना गरिएको मिस धनकुटा २०१९ को अडिसनबाट ४० जना युवती छनोट भएका छन् ।
गत भदौ १४ र १५ गते सम्पन्न अडिसनमा ६० जना युवतीहरुको सहभागिता रहेको थियो । उक्त अडिसनमा युवतीहरुको सुन्दरतासँगै बौद्धिक क्षमता, १६ देखि २४ बर्ष उमेर, एसइइ पास गरेको, पाँच फिट उचाई, ब्रेन र ब्युटीलगायतका आधारमा छनोट गरिएको आयोजक संस्था मोनाली इन्टरटेनमेन्ट एण्ड इभेन्ट प्रा.ली.का अध्यक्ष दीपक बराइलीले जानकारी दिए ।
अध्यक्ष बराइलीका अनुसार छनोट भएका ४० जना युवतीहरुलाई आगामी भदौ १९ गतेदेखि हुने मिस धनकुटाको व्याक्तित्व विकास, क्षमता अभिबृद्धि, भाषणकला बिधि, सौन्दर्य र पहिरन लगायतको तालिममा सहभागि गराईने छ ।

अडिसनमा नायक एसराज गराच, नायिका हर्षिका श्रेष्ठ, गायक तथा आयोजक संस्थाका अध्यक्ष दीपक बराइली र सहआयोजक संस्था लेडि जेसिज (प्र)धनकुटाका अध्यक्ष प्रमिसा श्रेष्ठलगायत निर्णायकमा रहनु भएको थियो भने फाइनलमा महानायक राजेश हमाल, नायक तथा गायक बाबु बोगटी, मिस नेपाल उषा खड्गी, नायिका रिचा शर्मालगायत राष्ट्रियस्तरका कलाकारहरुले निर्णय गर्ने जनाईएको छ ।
सह आयोजक संस्थाका अध्यक्ष श्रेष्ठका अनुसार आगामी असोज ४ गते गायक रामकृष्ण ढकाल, समिर बि.क., गायिका जिना रसाइली, गायक दीपक बराईली र स्थानीय कलाकारहरुको उपस्थितिमा धनकुटा बासीहरुका लागि म्युजीकल नाइट कार्यक्रम सञ्चालन गरिने छ ।
श्रेष्ठका अनुसार आगामी असोज ११ गते ट्यालेन्ट राउण्डका साथै आगामी असोज १८ गते मिस धनकुटा २०१९ छनोट गरी ताज पहिराईने बताइएको छ ।
व्याक्तिमा लुकेर बसेको अन्र्तरनिहित प्रतिभा सौन्दर्यलाई आजको २१ औ शताब्दि अनुरूप समाज देश र अन्तराष्ट्रिय सम्म फैलाउन धनकुटामा मोनाली इन्टरटेन्मेन्ट एण्ड इभेन्ट प्रा.लि. धनकुटाले मिस धनकुटा २०१९ मार्फत जिल्लामा भएको सौन्दर्यता लाई मध्यनजर गरी मिस धनकुटा छनौट गर्न लागेको हो ।