बेलका नगरपालिकामा ५ दिने आधारभुत पत्रकारिता तालिम सञ्चालन

उदयपुर : विकास, सुशासन र समृद्धिका लागि सञ्चार भन्ने मुल उद्धेश्यका साथ उदयपुरको बेलका नगरपालिकामा ५ दिने आधारभुत पत्रकारिता तालिम सञ्चालन गरिएको छ । बेलका मिडिया प्रा.लि. को आयोजना तथा बेलका नगरपालिका उदयपुरको सहयोगमा माध्यमिक तहको परिक्षा दिएर बसेका विद्यार्थीहरुलाई लक्षित गरि तालिमको आयोजना गरिएको हो ।

नगरभित्रका सञ्चार क्षेत्रमा रुचि भएका विद्यार्थीहरुलाई सञ्चार क्षेत्रमा अभ्यस्त बनाउन साथै विद्यार्थीहरुको क्षमता अभिवृद्धि गर्ने उद्धेश्यले तालिमको आयोजना गरिएको जनाईएको छ । तालिममा बेलका नगरपालिकाका प्रत्येक वडाबाट १ जना छात्र र १ जना छात्रा गरि नगरपालिकाका ९ वटा वडाबाट १८ जना विद्यार्थीको सहभागिता रहेको छ । सञ्चार माध्यमको पहुच विस्तार गर्न साथै युवावर्गलाई सञ्चार क्षेत्रमा आकर्षित गर्ने गरि तालिम आयोजना गरीएको जनाईएको छ ।

विगतमा पनि बेलका मिडिया प्रा.लि. ले आधारभुत र एडभान्स तालिमहरु सञ्चालन गरेको जनाएको छ । उक्त तालिमका केहि सहभागिहरु सञ्चारकर्ममा लागिसकेको आयोजक संस्थाका संयोजक सुमन सागर खतीवडाले सो अवसरमा जानकारी गराए र यस तालिमबाट अन्य यस्तै जनशक्ति उत्पादन हुने आयोजकको विश्वास रहेको छ । चैत्र १७ गतेदेखि सुरु भएको तालीम २१ गतेसम्म सञ्चालन हुनेछ ।