तोरीबारी खानेपानी तथा सरसफाइ उपभोक्ता समितिको ७औं साधारण सभा सम्पन्न

चतरा : बराहक्षेत्र नगरपालिका वडा नम्बर १ मा रहेको तोरीबारी खानेपानी तथा सरसफाई उपभोक्ता समितिले आफनो ७औं साधारण सभाको अवसर पारेर दुई जनालाई सम्मान गरेको छ ।

तोरीवारी खानेपानी तथा सरसफाई उपभोक्ता समितिका अध्यक्ष डम्बरप्रसाद सिग्देलको अध्यक्षता तथा बराहक्षेत्र नगरपालिका प्रमुख रमेश कार्कीको प्रमुख आतिथ्यमा भएको साधारणसभामा युवराज बस्नेत र रतनप्रसाद राईलाई सम्मान गरिएको हो ।

सम्मानित बस्नेत तोरीवारी खानेपानी तथा सरसफाई उपभोक्ता समितिका संस्थापक अध्यक्ष र राई पुर्व अध्यक्ष हुन् । उनीहरुलाई कार्यक्रमका प्रमुख अतिथी कार्कीले सम्मान पत्र र दोसल्ला ओढाएर सम्मान गरेका हुन् । सो अवसरमा प्रमुख अतिथी कार्कीले बराहक्षेत्रमा रहेका खानेपानी तथा सरसफाई उपभोक्ता समिति मध्येमा तोरीबारी खानेपानी तथा सरसफाई उपभोक्ता समिति उत्कृष्ट मध्ये पर्ने वताए । उनले क्रमिक रुपमा तोरीवारी खानेपानीले उपभोक्ताहरुलाई सहज रुपमा खानेपानी वितरण गर्दै आएको समेत जानकारी दिए ।

तोरीवारी खानेपानीले आफनो क्षेत्र भित्रका उपभोक्ताहरुलाई खानेपानीको पहुँच वढाउन व्यवस्थापन र सञ्चालनको काम गर्दै आएको अध्यक्ष डम्बरप्रसाद सिग्देलले जानकारी दिए । उनले ७ सय घरपरिवारलाई खानेपानी पुर्याउने लक्ष्य राखिएकोमा हाल १४ सय घरपरिवारलाई पुर्याई रहेको र आगामी दिनमा साडे ४ लाख लिटरको टंकी र अढाई लाख लिटरको टंकी सञ्चालनमा आएपछि आफ्नो क्षेत्रमा पर्ने २५ सय घरधुरीलाई नै पुग्ने अध्यक्ष सिग्देलले वताए ।

७औं साधारणसभाले नयाँ कार्यसमिति चयन गर्ने सो अवसरमा जानकारी गराइयो । तोरीवारी खानेपानी २०५४ साल देखि यस क्षेत्रका उपभोक्ताहरुलाई खानेपानीको सहज पहुँच पुर्याउने उद्धेश्यले काम गर्दै आएको छ ।