इटहरी : आज छैठको तेस्रो दिन बिभिन्न नदी खोला किनारमा व्रतालुहरुले अस्ताउँदो सुर्यलाइ अर्घ दिएर छैठ मनाइयो । सुनसरीको इटहरी उपमहानगरपालिका र मोरङको सुन्दरहरैचा नगरपालिकाको संगम स्थल बुढीगंगा मुक्तिघाटमा पनि व्रतालुहरुले साँझ नदी किनारामा पुगेर अस्ताउँदो सुर्यको उपासना गरेका छन् ।
यस पर्वमा सूर्यको उपासनाले सन्तान, निरोगिता, सुख, समृद्धि र चर्म रोग निको हुने जनविश्वासका आधारमा विभिन्न सजावटका सामाग्रीले सजाइएका ४०० बढी घाटहरुमा व्रतालुहरुले घण्टौँसम्म पुजा आर्चना गरेका छन् । छठ ब्रत लिए ब्रतालुहरुको मनोकांक्षा पूरा हुने धार्मिक विश्वास रहेको छ । विशेष गरी चर्म रोगको निवारण र आफ्नो एवम् परिवारका सदस्यको सन्तान प्राप्तीको कामना गर्दै यो ब्रत लिने चलन छ ।
चार दिनसम्म मनाइने छठ पर्वको मुख्य विधि अन्तर्गत पहिलो दिन (चतुर्थ) को विधिमा अरबा–अरबाइन गरिन्छ, जसलाई नहाय–खाय पनि भन्ने गरिएको छ । दोस्रो दिन खरना, तेस्रो दिन अस्ताउँदो र चौथो दिन उदाउँदो सूर्यलाई अर्घ दिने विधि गरिन्छ । आइतबार साँझ ब्रतालु तथा तिनका परिवारका सम्पूर्ण सदस्यहरु घर नजिकको पोखरी, नदी, सरोवर आदि जलाशय निर्मित आकर्षक छठी घाटमा पुगेर ब्रतालुको पूजा सामग्रीहरु राखिएको बाँसको छैंटी टाउकोमा बोकेर घाटसम्म लगी पुजा अर्चना गरेका छन् ।
यसैगरी खनार, इनरुवा, झुम्का, चतरा लगायत सुनसरीका अन्य विभिन्न स्थान साथै तराइका स्थानहरुमा पनि अस्ताउँदो सुर्यलाई अर्घ दिएर छठ पर्व मनाइएको छ । सोमबार बिहान उदाउँदो सूर्यको उपासना पछि प्रसाद खाएर मात्र ब्रत तोड्ने छन् । यो सँगै यस वर्षको छठ पर्व समापन गरीनेछ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved