प्रथम बराह नकआउट फुटबल प्रतियोगिता : आयोजकलाई हराउँदै सप्तकोशी फुटबल क्लब फाइनलमा

बराहक्षेत्र : बराहक्षेत्र वडा नं २ मा जारी प्रथम बराह नकआउट फुटबल प्रतियोगिता अन्तर्गत आज बुधबार भएको पहिलो सेमिफाइनल खेलमा सप्तकोशी फुटबल क्लबले आयोजक हाटखोला फुटबल क्लबलाई १-० ले हराउँदै फाइनलमा प्रवेश गरेको छ ।

६० मिनेटको खेल अवधिभर दुबै टिमले रोचक, उत्कृष्ट खेल प्रदर्शन गरेता पनि मध्यान्तर अगाडि दुबै टिमले गोल गर्न चुकेका थिए। पहिलो हाफ ०-० को बराबरीमा टुंगिएको थियो।

सप्तकोशी फुटबल क्लबका खेलाडी जर्सी नं. २ का सुसन लामिछाने द्वारा दोस्रो हाफको अन्तिम समयमा गरेको गोल नै निर्णायक साबित बन्यो ।

आजको खेलको म्यान अफ द म्याच सप्तकोशी फुटबल क्लबका सुभाष तामाङ घोषित भएका थिए । उनलाई आदर्श सामुदायिक वन उपभोक्ता समिती सचिव अमर कटुवालले नगर रु. २ हजार तथा ट्रफी प्रदान गरेका थिए ।

भोलिको अन्तिम सेमिफाइनल खेल एभरेष्ट फुटबल क्लब - नडाहा तथा पटनालि फुटबल क्लब - धरान बिच हुने कुरा आयोजक हाटखोला फुटबल क्लबका सचिव रोहित साहले जानकारी दिए ।