प्रथम बराह नकआउट फुटबल प्रतियोगिता : आयोजक हाटखोला फुटबल क्लब बिजयी

बराहक्षेत्र : बराहक्षेत्र वडा नं २ मा जारी प्रथम बराह नकआउट फुटबल प्रतियोगिता अन्तर्गत आज सोमबार भएको खेलमा आयोजक हाटखोला फुटबल क्लबले पन्चायन फुटबल क्लबलाई हराउँदै सेमिफाइनलमा आफ्नो स्थान पक्का गरेको छ ।

पन्चायन फूटबल क्लबलाई ० का विरुद्ध १ गोलले पराजित गर्दै आयोजक हाटखोला फुटबल क्लब सेमिफाइनलमा प्रवेश गरेको हो ।

मध्यान्तर अगाडि दुवै टिमले गोल गर्ने अवसर प्राप्त गरे पनि गोल गर्न चुकेका थिए। आयोजक हाटखोला फुटबल क्लबका खेलाडी जर्सी नं ९ का विपिन मगरले दोस्रो हाफको २० औं मिनेटमा गरेको गोल नै जितको लागि निर्णायक सावित भयो ।

आजको खेलको म्यान अफ द म्याच आयोजक हाटखोला फुटबल क्लबका खेलाडी अमन घिसिङ्ग भएका थिए उनलाई हिमालयन बोर्डिङ्ग स्कुलका प्रध्यानाध्यापक आलोक श्रेष्ठले नगर रु २ हजार रुपैयाँ तथा ट्रफी प्रदान गरेका थिए ।

प्रतियोगितामा प्रथम हुने टिमलाई नगद रु ५१ हजार दोस्रो ३१ हजार रुपैयाँ तथा ट्रफी पाउने कुरा आयोजक क्लबका सचिव रोहित साहले बताए ।

बराहक्षेत्र वडा नं २ हाटखोला निवासी हाल हङकङ बसोबास गर्ने मज्जाको राई (नाम्गेल) ले प्रत्येक खेलमा पहिलो गोल गर्ने खेलाडीलाई नगद रु १ हजार रुपैयाँ तथा ट्रफी उपलब्ध गराएका छन् ।

प्रथम पुरस्कार राशि नगद रुपैयाँ ५१ हजार रुपैयाँ चतरा सामुदायिक बहुउद्देश्यीय सहकारी संस्थाले प्रायोजन गरेको छ भने दोस्रो पुरस्कार नगद रुपैयाँ ३१ हजार रुपैयाँ आदर्श सामुदायिक वन उपभोक्ता समिती बराहक्षेत्र वडा नं २ ले प्रायोजन गरेको कुरा हाटखोला फुटबल क्लब अध्यक्ष विकास सुनुवार जानकारी दिए ।

खेल अवधिभर प्राथमिक स्वास्थ्य केन्द्र चतराका स्वास्थ्यकर्मीहरुले घाइते खेलाडीहरुलाई खेल मैदानमा प्राथमिक उपचारको सेवा सुविधा दिई रहेका छन् ।

भोलिको खेल पटनालि फुटबल क्लब धरान तथा ग्रिन कल्चरल फुटबल क्लब ‌चक्रघटी विच हुने कुरा राष्ट्रिय फुटबल खेलाडी रोसन श्रेष्ठले जानकारी दिए ।