प्रथम बराह नकआउट फुटबल प्रतियोगिता : पन्चायन फुटबल क्लब बिजयी

बराहक्षेत्र : बराहक्षेत्र वडा नं २ मा जारी "प्रथम बराह नकआउट फुटबल प्रतियोगिता" अन्तर्गत आज शनिवार भएको खेलमा पन्चायन फुटबल क्लब बिजयी भएको छ ।

राजावास फूटबल क्लबलाई १ का विरुद्ध ० गोलले हराउँदै पन्चायन फुटबल क्लब दोस्रो चरणमा प्रवेश गरेको हो । पन्चायन फुटबल क्लबका खेलाडी जर्सी नं ९ का सुसन मगरले पहिलो हाफको १० मिनेटमा गरेको गोल नै टिमको लागि निर्णायक सावित भयो ।

राजावास फुटबल क्लबका खेलाडीहरुले विपक्षीको गोल पोष्टमा बारम्बार प्रहार गरेपनि गोल गर्न नसक्नु नै हारको कारण रहेको थियो।

खेल को म्यान अफ द म्याच पन्चायन फुटबल क्लबका गोलकर्ता सुसन मगर भएका थिए । उनलाई राष्ट्रिय फुटबल खेलाडी रोसन श्रेष्ठले नगद रु. २ हजार रुपैयाँ तथा ट्रफी प्रदान गरेका थिए ।

प्रतियोगितामा प्रथम टिमलाई नगद रु ५१ हजार दोस्रो ३१ हजार रुपैयाँ तथा ट्रफी पाउने कुरा आयोजक क्लबका सचिव रोहित साहले बताए । बराहक्षेत्र वडा नं २ हाटखोला निवासी हाल हङकङ बसोबास गर्ने मज्जाको राई (नाम्गेल) ले प्रत्येक खेलमा पहिलो गोल गर्ने खेलाडीलाई नगद रु. १ हजार रुपैयाँ तथा ट्रफी प्रायोजन गरेका छन् ।

भोलिको खेल पटनाली फुटबल क्लब, धरान तथा बराह युथ क्लब, तित्रिगाछी बिच हुने छ । देश विदेशमा रहेका खेल प्रेमी दर्शकहरुको चाहानालाई मध्य नजर गर्दै बाइस बिगे खेल मैदानमा सन्चालन भइरहेको फुटबल प्रतियोगिताको प्रत्यक्ष प्रशारण गोल नेपाल डट कम तथा एरीना टेलिभिजनले गरीरहेका छन् ।