विराटनगर । मोरङ कारागारमा गुन्डा नाइके अभिषेक गिरीलाई पठाउने निर्णयको चौतर्फी विरोध भएपछि उनको स्थानान्तरण तत्काललाई रोकिएको छ ।
गिरीलाई मोरङ ल्याउने निर्णयको चौतर्फी विरोध भएपछि तत्कालका लागि उनको स्थानान्तरण रोकिएको हो । गिरी आउने भएपछि मोरङ कारागारअगाडि दुई दिनयता दैनिकजसो प्रदर्शन हुने गरेको थियो । गिरी चौकीदार रहँदा कैदीबन्दीलाई निर्घात कुटपिट गर्ने र शोषण गर्ने गरेको भन्दै आफन्तले कारागार अगाडि प्रदर्शन गरेका हुन् । कैदीबन्दीका आफन्तले गिरीलाई मोरङ कारागारमा ल्याउनु हँुदैन भन्दै मोरङका प्रमुख जिल्ला अधिकारीलाई समेत ज्ञापनपत्र बुझाएका थिए ।
गिरी आउने भएपछि कारागार व्यवस्थापन कार्यालय मोरङले चौकीदार नविन राईलाई क्षेत्रीय कारागार झुम्का सोमबार पठाएको थियो । जिल्ला कारागार मोरङका निमित्त प्रमुख रामप्रसाद पोखरेलका अनुसार चौकीदार राईलाई झुम्का कारागारमा स्थानान्तरण गरिएपछि किरण गुरुङलाई चौकीदारको जिम्मेवारी दिइएको छ । गुरुङलाई दिइएको जिम्मेवारी अस्थायी हो । गुरूङ कर्तव्य ज्यान मुद्दाका प्रतिवादी हुन् ।
‘काम नरोकियोस् भन्नका लागि हत्या मुद्दामा कैद भुक्तान गरिरहेका गुरुङलाई अर्काे व्यवस्था नभएसम्मका लागि नियुक्त गरिएको हो,’ उनले भने, ‘चौकीदारको नियुक्ति एक वर्षे हुन्छ ।’ चौकीदारको नियुक्ति कारागार कार्यालय र प्रमुख जिल्ला अधिकारीको सिफारिसमा कारागार व्यवस्थापन विभागले गर्ने प्रावधान छ ।’
गिरी यसअघि मोरङमा रहँदा पनि चौकीदार नै थिए । मोरङ कारागार भित्रबाटै गुण्डागर्दी र फिरौती असुली गरेको गुनासो बढेपछि २०७४ साल चैत २३ गते विराटनगरबाट डिल्लीबजार कारागार सरुवा गरिएको थियो । तर भदौ १७ गते पुनः विराटनगर सरुवाको निर्णय भएको हो । उनीसँगै उनका सहयोगी अपहरण मुद्दामा कैद भुक्तान गरिरहेका राजु श्रेष्ठ, असित सैँवु र वन मुद्दाका कैदी मनोज कार्कीलाई विराटनगर पठाउने निर्णय भएको पत्र गत भदौ तेस्रो साता विराटनगर आएको थियो ।
कारागार व्यवस्थापन विभागका महानिर्देशक जनकराज दाहालका अनुसार गिरीलाई मोरङ पठाउने निर्णय भए पनि तत्काल कार्यान्वय हुँदैन । ‘अभिषेक गिरीलाई मोरङ स्थानान्तरण गर्ने निर्णय तत्काललाई स्थगन गरिएको छ,’ उनले भने, ‘एक महिनाअघि स्थानान्तरणको निर्णय भएको थियो ।’ तत्काल रोकिए पनि केही दिनपछि आउनसक्ने उनको भनाइ छ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved