रुपन्देही / रुपन्देहीको सीमा नाकाबाट हुने मानव बेचबिखनका घटना नियन्त्रणमा आउन सकेको छैन । रुपन्देहीका विभिन्न नाका हुँदै मानव तस्करले नेपाली महिला तथा बालबालिकालाई विभिन्न बहानामा भारत तथा तेस्रो मुलुक पुर्याएर बिक्री गर्ने गरेको माइती नेपालको तथ्याङ्कले देखाएको छ ।
माइती नेपालको रुपन्देही शाखाले मानव बेचबिखनका घटना नरोकिएको जनाएको हो । चालु आर्थिक वर्ष २०७८ / ०७९ का दुई महिना साउन र भदौमा मात्र रुपन्देहीको बेलहिया नाकाबाट ५६ महिला तथा बालबालिकालाई मानव तस्करले भारततर्फ लैजाँदै गर्दा उद्धार गरिएको छ ।
गत तीन आवको तथ्याङ्क हेर्दा रुपन्देहीका नाका हुँदै हुने गरेका मानव बेचबिखनका घटना नरोकिएको देखिएको छ । आव २०७५ /०७६ मा २५३ लाई भारत लैजाँदै गरेको अवस्थामा नेपाल–भारत सीमा क्षेत्र बेलहियाबाट उद्धार गरिएको थियो। पचास जनालाई भारतका विभिन्न सहरबाट उद्धार गरी नेपाल ल्याएको माइती नेपाल रुपन्देही शाखाले जानकारी दिएको छ ।
आव २०७६ /०७७ मा २४२ लाई भारत लैजाँदै गरेको अवस्थामा नेपाल–भारत सीमा क्षेत्र बेलहियाबाट उद्धार गरिएको छ । १४ जनालाई भारतका विभिन्न सहरबाट उद्धार गरी नेपाल ल्याइएको माइती नेपालले जनाएको छ । त्यसैगरी आव २०७७ /०७८ मा १५१ जनालाई भारत लैजाँदै गरेको अवस्थामा नेपाल–भारत सीमा क्षेत्रबाट उद्धार गरिएको छ । आठ जनालाई भारतका विभिन्न सहरबाट उद्धार गरी नेपाल ल्याएको माइती नेपाल शाखा प्रमुख माया क्षेत्रीले जानकारी दिइन् ।
नेपालबाट यसरी तस्करी गरी महिलालाई भारतीय कोठी र खाडी मुलुकमा पठाउने काम मानव तस्करले गर्ने गरेका छन् भने बालबालिकालाई विभिन्न सर्कसमा प्रयोग गर्ने गरेको पाइन्छ । विशेष गरी महिला तथा किशोरीलाई मानव तस्करले विभिन्न प्रलोभन पारेर नेपालका विभिन्न नाकाबाट भारततर्फ लैजाने गरेको प्रहरीले जनाएको छ ।
महिला तथा बालबालिका बेचबिखनविरुद्ध काम गर्ने माइती नेपालले देशका विभिन्न सीमानाकामा आफ्नो कार्यालय राखी मानव बेचबिखनलाई न्यूनीकरण गर्ने काम गरे पनि यो बेचिनेक्रम भने नरोकिएको देखिएको छ ।
काभ्रेपलाञ्चोक, सिन्धुपाल्चोक, सिन्धुलीलगायत जिल्लाबाट मानव तस्करले नेपाली महिला तथा बालबालिकालाई प्रलोभनमा पारेर भारतीय क्षेत्रमा पुर्याउने गरेका माइती नेपालले जनाएको छ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved
