आईसीसी विश्वकप क्रिकेट लिग टू अन्तर्गत आज नेपालले अमेरिकासँग खेल्दै

काठमाडौं । आजबाट ओमानमा सुरु हुने आईसीसी विश्वकप क्रिकेट लिग लिग टू अन्तर्गत त्रिदेशीय शृ‌खलाकाे पहिलाे खेलमा नेपालले अमेरिकासँग प्रतिस्पर्धा गर्दैछ ।कोरोना महामारीका कारण पूर्व निर्धारित तालिकामा असर परेपछि लिग टू अन्तर्गत ३६ मध्ये नेपालले आज पाँचौं खेल खेल्न लागेको छ ।

यसअघि करिव डेढ वर्षअघि नेपालमै भएको शृंखलामा घरेलु टोलीले चार खेलमा ४ अंक बनाएको छ । लिग टूको शीर्ष तीनभित्र रहेर एकदिवशीय विश्वकप खेल्ने आशा जगाउन नेपालका लागि यो शृंखला निकै महत्वपूर्ण छ ।लिग टू मा अमेरिकाले अहिलेसम्म १२ खेल खेलेकोमा ६ खेलमा जित हासिल गरेको छ भने ६ खेलमा पराजय ब्यहोरेको छ ।

नेपालमा भएको शृंखलामा अमेरिकाले नेपालसँग दुई गरी चारै खेलमा पराजय ब्यहोरेको थियो ।तर अमेरीका अन्तिमपल्ट फेब्रुअरी २०२० मा नेपाल आउँदा र अहिलेको टिममा निकै परिवर्तन भएको छ । त्यो बेला टिममा रहेका केहि खेलाडी अहिलेको टिममा छैनन् । यसका साथै यो पटक टिममा केहि युवा खेलाडीलाई समेटिएको छ भने दुई जनाले पहिलो पटक लिग टू मा डेब्यू गर्दैछन्।यो पटक अमेरिकी टिम पूर्ण आत्मविश्वासका साथ ओमान पुगेको छ ।

पाकिस्तान र भारत र वेष्ट इन्डिजका खेलाडीको मिश्रण रहेको अमेरिकी टिमका कप्तान सौरभ नेत्रवाल्करले नेपाललाई सजिलो प्रतिद्धन्द्धी नभएपनि जित निकाल्नेमा विश्वस्त रहेको बताएका छन् ।यता नेपाली टिमका उपकप्तान दिपेन्द्रसिंह ऐरीले यो सिरिज खेल्न नसक्ने भएपछि टिमलाई ठूलो झट्का लागेको छ ।

उनको दायाँ खुट्टाको गोलीगाँठामा चोट लागेकाले केहि समय उनलाई आराम गर्नुपर्ने भएको छ ।अमेरीकाविरुद्ध खेल्दा नेपालकालागि मुख्य हतियार स्पिनर सन्दिप लामिछाने, सोमपाल कामी र करण केसी हुन सक्छन । सन्दिपले घरेलु मैदानमा अमेरिकालाई ध्वस्त पार्न एक्लैले ६ विकेट लिएका थिए ।नेपाल र अमेरीकाले एकदिवसिय मान्यता पाएपछि लिग टु सिरिजमा तेस्रो पटक खेल्न लागेका हुन ।

नेपालले यसअघि कीर्तिपुर मैदानमा पहिलो खेलमा ३५ रनले जितेको थियो भने दोस्रो खेलमा ८ विकेटले हराएको थियो । नेपाल र अमेरिकाबीच सन् २००८ मै एकदिवशीय खेल भएको थियो ।डिभिजन ५ देखिका प्रतिद्वन्द्वी नेपाल र अमेरिकाले ५० ओभरमा ६ पटक खेलेका छन ।

जसमा तीन खेल नेपालले जितेको छ भने अमेरीकाले तीन खेल जितेको छ । नेपाल र अमेरिकाबीच ओमान क्रिकेट एकेडेमीको मैदानमा आजका खेल नेपाली समय अनुसार अपराह्न सवा चार बजेबाट सुरु हुनेछ ।