काठमाडौं । पपुवा न्यूगिनी (पीएनजीं सँगको दोस्रो एकदिवसीय म्याचमा नेपाल १५१ रनले विजयी भएको छ ।
योसँगै नेपालले दुई खेलको सिरिज २-० ले जितेको छ । पहिलो खेलमा नेपालले पीएनजीलाई २ विकेटले हराएको थियो ।
आजको जितसँगै नेपालले इतिहास पनि रचेको छ । हालसम्म पीएनजीलाई यति ठूलो रन अन्तरले हराएको थिएन ।
दोस्रो खेलमा नेपालले दिएको २ सय ३४ रनको लक्ष्य पछ्याएको पीएनजीले १९.१ ओभरमा सबै विकेट गुमाएर ८२ रन मात्र बनाउन सक्यो ।
उसका लागि टोनी उराले १९, चाल्स अमिनीले १६, नर्मन भानुआले १२, सेसे बउले ११ र गौडी टोकले १० रन बनाए । बाँकी ब्याट्सम्यानले भने दोहोरो अंकमा समेत रन जोड्न सकेनन् ।
बलिङमा आज पनि सन्दीप लामिछाने चम्किँए । उनले आज ५.१ ओभरमा ११ रन दिएर ६ विकेट लिए ।
एकदिवसीय करियरमा सन्दीपको यो उत्कृष्ट बलिङ प्रदर्शन हो । यसअघि उनले अमेरिकाविरुद्ध १६ रन दिएर ६ विकेट लिएका थिए ।
त्यस्तै, सुशान भारी, सोमपाल कामी र विक्रम सोबले एक/एक विकेट हात पारे ।
त्यसअघि, टस जितेर पहिला ब्याटिङ गरेको नेपालले ४९.३ ओभरमा सबै विकेट गुमाएर २ सय ३३ रन बनायो ।
उसका लागि युवा ब्याट्सम्यान रोहितकुमार पौडेलले उत्कृष्ट ब्याटिङ गरे । उनले १२३ बलमा तीन छक्का र दुई चौकाको मद्दतमा ८६ रन बनाए ।
एकदिवसीय क्रिकेटमा रोहितको यो करियरकै उत्कृष्ट ब्याटिङ हो । यसअघि यो प्रारूपमा उनको उच्च स्कोर ५५ रन थियो ।
त्यस्तै, करण केसीले आक्रामक ब्याटिङ गरे । उनले २४ बलमा चार छक्का र दुई चौकासहित ४२ रन बनाए । एकदिवसीय क्रिकेटमा करणको पनि यो करियरकै उच्च प्रदर्शन हो ।
यसअघि वानडेमा उनको उच्च स्कोर १८ रन थियो । त्यस्तै, आज कप्तान ज्ञानेन्द्र मल्लले ४५, विनोद भण्डारीले १७, सोमपाल कामीले ११, कुशल भुर्तेल र आशिफ शेखले तीन–तीन रनको योगदान दिए ।
बलिङमा चाड सोपरले सर्वाधिक तीन विकेट लिए ।
ज्ञानेन्द्र र रोहितले बनाए कीर्तिमान
कप्तान ज्ञानेन्द्र मल्ल र युवा ब्याट्सम्यान रोहित पौडेलले कीर्तिमान बनाएका छन् । उनीहरूले एकदिवसीय क्रिकेटमा नेपालको तर्फबाट कुनै पनि विकेटका लागि सर्वाधिक ठूलो साझेदारी बनाउने कीर्तिमान बनाएका हुन् ।
रोहित र ज्ञानेन्द्रले यो उपलब्धि पीएनजीसँगको दोस्रो म्याच हासिल गरे । मल्ल र पौडेलबीच तेस्रो विकेटका लागि ८९ रनको साझेदारी गरे ।
यसअघि ओडिआईमा नेपालबाट सर्वाधिक ठूलो साझेदारी कुशल मल्ल र विनोद भण्डारीको नाममा थियो । उनीहरूले गत वर्ष अमेरिकाविरुद्ध ८४ रनको साझेदारी गरेका थिए ।
कौजा वागीले रचे इतिहास
नेपालले पहिलो विकेटका रूपमा आशिफ शेखलाई गुमायो । उनी ३ रनमै आउट भए । नेपालले पहिलो विकेट २.१ ओभरमै गुमाउन पुगेको थियो ।
आशिफलाई आज डेब्यू गरेका कौजा वागीले आउट गरे । उनी क्याच आउटको सिकार भए । आशिफको विकेट लिने वागीले आज डेब्यू गरेका हुन् । उनले डेब्यू म्याचको पहिलो बलमै विकेट लिन सफल भए ।
पहिलो म्याचमा नेपाली बलर विक्रम सोबले पनि पहिलो बलमै विकेट लिँदै इतिहास रचेका थिए । अब कौजाले पनि पीएनजीका लागि इतिहास रचेका छन् ।
नेपालले अब पीएनजीसँगको म्याचपछि आईसीसी विश्वकप लिग-२ अन्तर्गत ओमान र अमेरिकासँगको सिरिज खेल्ने छ । नेपालले सो सिरिजअन्तर्गत पहिलो खेल सोमबार अमेरिकाविरुद्ध खेल्ने छ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved
