एजेन्सी : स्पेनिस ला लिगा फुटबलमा बार्सिलोनाले विजयी सुरुवात गरेको छ । आइतबार राति सम्पन्न खेलमा बार्सिलोनाले रियल सोसिड्याडमाथि ४–२ को जीत निकालेको छ ।
खेलको १९ औँ मिनेटमा नयाँ खेलाडी मेम्पिस डिपेको फ्रि किकमा जेरार्ड पिकेले हेडर मार्फत गोल गरेर बार्सिलोनालाई अग्रता दिलाएका थिए । त्यसपछि मार्टिन ब्राथवेटले ४५ औँ र ५८ औँ मिनेटमा गोल गर्दै बार्सिलोनाको अग्रता ३-० बनाए ।
तर ८१ औँ र ८४ औँ मिनेटमा जुलेन लोबेटे र मिकेल ओयारजाबालले गोल गर्दै सोसिड्याडलाई खेलमा फर्काउन प्रयास गरेता पनि इन्जुरी समयमा सर्जी रोबर्टोले गोल गर्दै बार्सिलोनाको ४-२ को जीत सुनिश्चित गरे ।
१७ वर्षपछि बार्सिलोनाबाट बिदा भएका स्टार खेलाडी लियोनेल मेस्सी बिनाको यो पहिलो सिजन हो । मेस्सीले बार्सिलोना छाडेपछि टोलीले यो सिजन कस्तो प्रदर्शन गर्ला भन्ने कुरा उठिरहेको बेला यो जितले केहि उत्साह प्रदान गरेको छ ।
आइतबार राति नै सम्पन्न भएका अन्य खेलमा एथ्लेटिको मड्रिडले सेल्टा भिगोलाई २–१ ले हराउँदा सेभियाले रायो भायकानोलाई ३–० ले पराजित गर्यो ।
प्रतिक्रिया दिनुहोस
Copyright © 2019 / 2024 - Newpati.com - All rights reserved