एजेन्सी । टोकियो ओलम्पिकको पदक तालिकामा आयोजक राष्ट्र जापान शीर्ष स्थानमा उक्लिएको छ । १० स्वर्णसहित जापान अमेरिका र चीनलाई उछिन्दै शीर्ष स्थान ओगट्न सफल भएको हो ।
जापानले हालसम्म १० स्वर्ण, तीन रजत र पाँच कास्यसहित कूल १८ पदक प्राप्त गरेको छ । अमेरिका दोस्रो तथा चीन तेस्रो स्थानमा रहेका छन् । अमेरिकाले नौ स्वर्ण, आठ रजत र आठ कास्य पदकसहित २५ पदक प्राप्त गरेको छ । समग्र पदक सङ्ख्यामा भने अमेरिका अगाडि छ ।
बेलायत चार स्वर्ण, पाँच रजत र चार कास्य पदकका साथ पाँचौँ स्थानमा रहेको छ भने दक्षिण कोरिया तीन स्वर्ण, दुई रजत र पाँच कास्यसहित छैटौँ, अस्ट्रेलिया तीन स्वर्ण, एक रजत र पाँच कास्यका साथ सातौँ, क्यानडा दुई स्वर्ण, तीन रजत र तीन कास्य जित्दै आठौँ स्थानमा छ । नवौँ स्थानको फ्रान्स र दसौँ स्थानको जर्मनीले पनि दुई–दुई स्वर्ण जितेका छन् ।
नेपालबाट चार खेलमा पाँच खेलाडी टोकियो ओलम्पिकमा सहभागी भएकामा दुई खेलाडीले प्रतिस्पर्धा गर्न बाँकी छ । सुटिङकी कल्पना परियार, जुडोकी सोनिया भट्ट र पौडीका एलेक्स शाहले खेलिसकेका छन् ।
टोकियो ओलम्पिकमा अब पौडीका गौरिका सिंह र एथलेटिक्सकी सरस्वती चौधरीले प्रतिस्पर्धा गर्न बाँकी छ । सिंहले महिला १०० मिटर फ्रि स्टाइल र चौधरीले महिला १०० मिटर दौडमा प्रतिस्पर्धा गर्नेछन् । सिंहले बुधबार तथा चौधरीले शुक्रबार आआफ्नो खेलमा प्रतिस्पर्धा गर्नेछन् ।
प्रतिक्रिया दिनुहोस
Copyright © 2019 / 2024 - Newpati.com - All rights reserved