इटहरी ।जिल्ला प्रहरी कार्यालय मोरङमा स्टकमा रहेको बम एवं विष्फोटक पदार्थ नष्ट (डिस्पोज) गर्न थालिएको छ । माओवादी सशस्त्र द्वन्द्वका समयमा प्रहरीले पाएको विष्फोटक पदार्थ शान्ति सम्झौताको १५ वर्षपछि नष्ट गर्न थालिएको हो ।
तत्कालीन सरकारले माओवादी गतिविधि नियन्त्रण गर्न २०५९ सालमा प्रहरीलाई प्लाष्टिक हेन्ड–ग्रिनेट, ग्यास–हेन्ड ग्रिनेट, लङरेन्ज–हेन्ड ग्रिनेटसमेतका विष्फोटक पदार्थ उपलब्ध गराएको थियो ।
तीमध्ये मोरङमा प्लाष्टिक हेन्ड–ग्रिनेट ३२७, ग्यास–हेन्ड ग्रिनेट ११० र लङरेन्ज–हेन्ड ग्रिनेट ६९ थान स्टकमा थिए । मोरङ प्रहरीका प्रवक्ता डिएसपी दीपक श्रेष्ठका अनुसार स्टकमा भएका र म्याद सकिएका विष्फोटक पदार्थ नष्ट गर्न थालिएको हो ।
प्रयोगविहीन भएर काम नलाग्ने अवस्थामा पुगेका विष्फोटक पदार्थ नष्ट गर्न प्रहरी प्रधान कार्यालयले परिपत्र गरेपछि कानेपोखरी जङ्गलमा लगेर नष्ट गर्न थालिएको उनले बताए ।
प्रदेश १ प्रहरी कार्यालय विराटनगरका प्रवक्ता एसपी नवीनराज राईले लामो समयअघि सरकारले सुरक्षा निकायलाई दिएका विष्फोटक पदार्थ पुरानो भएर कामै नलाग्ने अवस्थामा पुगेको बताए ।
यस्ता पदार्थ भण्डारणस्थलमै विष्फोट भएर मानवीय एवं भौतिक क्षति गर्नसक्ने जोखिम बढेपछि नेपाली सेनासँगको समन्वयमा नष्ट गर्न थालिएको उनको भनाइ छ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved
