बिराटनगर । प्रदेश १ मा दुई वर्षअघि सम्पन्न विवादस्पद मुख्यमन्त्री कप फुटबल प्रतियोगितामा आर्थिक अनियमितता नभएको ठहर सार्वजनिक लेखा समितिले गरेको छ ।
प्रदेश १ को सार्वजनिक लेखा समितिले दुई वर्ष लगाएर गरेको फुटबल छानबिनको वार्षिक प्रतिवेदन सदनमा पेस गरेको छ । समिति सभापति शिवनारायणसिंह गन्गाईंले बिहीबार प्रदेश सभामा विवादास्पद प्रतियोगिताको विवरणसहित समितिको वार्षिक प्रतिवेदन पेस गरेका हुन् ।
छानबिनका क्रममा प्रतियोगितामा भएका आर्थिक पक्षका कागजात मगाएर अध्ययन गरिएको समितिले जनाएको छ । आर्थिक पक्षमा अनियमितता नभएको प्रस्ट्याउँदै समितिले प्राविधिक पक्षमा थप छानबिन गर्न र बेरुजु असुलउपर गर्नका लागि सामाजिक विकास समितिलाई जिम्मा लगाएको थियो ।
समितिले प्रतियोगितामा भएको आर्थिक पक्षका सन्दर्भमा २०७६ चैत्र ७ गतेको बैठकबाट आर्थिक पक्षमा छानबिन गर्न नपर्ने निर्णय गरेको थियो । यद्यपि प्रतियोगितामा केही पदाधिकारीले राजस्व तिर्न बाँकी रहेको र उनीहरुको नाममा बेरुजु देखिएको करिब १७ हजार रुपैयाँ दाखिला गर्न निर्देशन दियो । समितिले गतवर्ष माघ २७ गते आयोजक पक्षलाई ‘क्लिन चिट’ दिनुपूर्व नै बेरुजु देखिएको राजस्व रकम दाखिला गरेको एक पदाधिकारीले जानकारी दिए ।
प्रतियोगिता २०७६ असार १६ गतेबाट असार ३१ गतेसम्म सञ्चालन गरिएको थियो । प्रतियोगिताका लागि सामाजिक विकास मन्त्रालयले एक करोड र अखिल नेपाल फुटबल संघ (एन्फा) ले आवद्ध जिल्लाका लागि तयारी रकम ३३ लाख रुपैयाँ उपलब्ध गराएका थिए ।
असारमा बजेट सक्नका लागि प्रतियोगिता गरिएको भन्दै आलोचना, विरोध र प्रदेश सभामा सांसदले प्रश्न उठाएपछि लेखा समितिले छानबिनमा चासो दिएको थियो । प्रतियोगिताअन्तर्गतका विभिन्न खेल धरान, उदयपुर र इलाममा भएका थिए ।
प्रतियोगिताको उपाधि झापाको सैनिक युथ क्लबले जितेको थियो । विजयी टिम तथा खेलाडीहरुलाई प्रदेश १ का मुख्यमन्त्री शेरधन राईले पुरस्कार, नगद तथा शिल्ड वितरण गरेका थिए ।
समिति सभापति गन्गाईंले फुटबल अनियमितताको छानबिनमा केही ढिलाइ भएको स्वीकार गरे । प्रतियोगितासँग सम्बन्धित विभिन्न कागजपत्र र बिलभौचर समयमा उपलब्ध नहुँदा छानबिनमा समय लागेको उनको भनाइ छ । ‘बिलभौचर लगायतका कागजपत्र मागेका समयमा उपलब्ध नहुँदा बेलैमा रुजु गर्न सकिएन,’ गन्गाईंले भने, ‘सबै कुरा पहिल्याउँदै वास्तविकता पत्ता लगाएर प्रतिवेदन तयार पार्न ढिलो भएकै हो ।’
प्रतिक्रिया दिनुहोस
Copyright © 2019 / 2024 - Newpati.com - All rights reserved