व्यवसायीको हत्यामा संलग्न तीन पक्राउ

WEB PIC

विराटनगर । मोरङको लेटाङ्ग नगरपालिका–३ त्रिशुली चौकका २२ वर्षीय व्यवसायी रोमन राईको हत्या आरोपमा थप एक जना पक्राउ परेका छन् । गत शुक्रबार राति भएको हत्यामा संलग्न दुई जनालाई प्रहरीले सोहि राति पक्राउ गरेको थियो ।

इलाका प्रहरी कार्यालय लेटाङले यसअघि लेटाङ ३ का २१ वर्षीय सुशील दर्जी नेपाली र २० वर्षीय दिलबहादुर लिम्बूलाई पक्राउ गरेकोमा शनिबार साँझ १९ वर्षीय भुपाल लिम्बूलाई पनि पक्राउ गरेको छ ।

प्रहरीले लिम्बू र दर्जीलाई पक्राउ गरेपछि उनीहरुको बयानको आधारमा हत्यामा भुपालको पनि संलग्नता रहेको खुलेको थियो । मोरङ प्रहरीका प्रवक्ता डिएसपी मानबहादुर राईका अनुसार डेड वर्ष अगाडि राईले ठेक्कामा लिएर चलाएको ट्याक्टरमा काम गरेको पैसा नदिएपछि उनीहरुले शुक्रबार राति घरमै पुगेर छुरा प्रहार गरेका थिए ।

लेटाङको त्रिशुली चौकमा शुक्रबार राति साढे ८ बजे पैसा माग्न तीन जना राईको घर पुगेका थिए । पैसा माग्ने क्रममा बढेकोमा विवादमा राईको पेटमा सुशील र दिलबहादुरले छुरा प्रहार गरेर गम्भीर घाइते बनाई फरार भएका थिए ।

आफन्तले उपचार गर्न विराटनगरस्थित विराट नर्सिङ होममा ल्याउने क्रममा राईको बाटोमा नै मृत्यु भएको थियो । छुरा प्रहार गर्ने र मृत्यु हुने नजिकका मिल्ने साथी हुन् ।

काममा लगाएर आफूहरुले पाउनुपर्ने पैसा लामो समयदेखि नदिएकाले छुरा हानिएको बयान पक्राउ परेकाहरुले प्रहरीमा दिएका छन् । पक्राउ परेका तीन जनालाई इप्रका लेटाङले आइतबार ‘कर्तब्य ज्यान’ मुद्दामा म्याद थप गरि अनुसन्धान गरिरहेको मोरङ प्रहरीले जनाएको छ ।