दक्षिण कोरियामा कोरोना संक्रमण पुन फैलियो

दक्षिण कोरियामा कोरोना संक्रमण पुनः फैलिएको छ । गत २४ घण्टामा दक्षिण कोरियामा ४६ हजार ८ सय ९६ जनामा कोरोना संक्रमण पुष्टि भएको हो । योसँगै कुल संक्रमितको संख्या २ करोड ५७ लाख १७ हजार २ सय ७७ जना पुगेको दक्षिण कोरियाको स्वास्थ्य मन्त्रालयले पुष्टि गरेको छ ।

यसअघि बुधबार एकैदिन ५४ हजार ७ सय ६६ जना मानिसमा कोरोना संक्रमण पुष्टि भएको थियो । कोरोना संक्रमित मध्ये गम्भीर अवस्थाका संक्रमितको संख्या बढ्दै गएको छ । दुई दिनमा ४१ जनाको मृत्यु भएको छ ।

यसैबीच दक्षिण कोरियाली सरकारले सर्वसाधारणको लापरबाहीका कारण कोरोना संक्रमण दर बढेको भन्दै कोरोना महामारी नियन्त्रणका लागि थप कदम चाल्न बाध्य हुने चेतावनी दिएको छ ।

सर्वसाधारणको भीडभाड र सामाजिक दूरी कायम नगरेका कारण नै कोरोना संक्रमण दर बढेको भन्दै सरकारले सचेत रहन समेत अपील गरेको छ ।