प्रदेश १ को नाम ‘लिम्बुवान किरात प्रदेश’ घोषणा गर्न माग

प्रदेश १ को नाम ‘लिम्बुवान किरात प्रदेश’ घोषणा गर्न माग गर्दै प्रदेश १ को राजधानी विराटनगरमा प्रदर्शन गरीएको छ । पहिचानका आधारमा प्रदेशको नाम घोषणा गर्न माग गर्दै विभिन्न जिल्लाबाट विराटनगर आएका पहिचानवादीहरूले बिहिबार मुख्यमन्त्री कार्यालय अगाडि प्रदर्शन गरेका हुन् । नाकारणका छलफलमा रहेका राजनीतिक दलले पहिचानका विषयमा कुनै चासो नराखेको आरोप उनीहरुको आरोप छ । नेपाली कांग्रेस र नेकपा एमाले भुगोलका आधारमा नामाकरण गर्नुपर्ने पक्षमा देखिएका छन् भने नेकपा (माओवादी केन्द्र), जनता समाजवादी पार्टी र लिम्बूवान पक्षधर पार्टीहरूको भने पहिचानकै आधारमा हुनुपर्ने तर्क रहिआएको छ ।

केही समय अगाडी इटहरीमा पत्रकार सम्मेलन गरी लिम्बुवान,किरात संयुक्त संघर्ष समितिमा आबद्ध नेकपा माओवादी केन्द्र आबद्ध लिम्बुवान राष्ट्रिय मोर्चा,जसपा,नेपाल लिम्बुवान राष्ट्रिय समिति लगायत ३१ घटक संगठनहरुले पहिचानका आधारमा प्रदेश १ को नामाकरण हुनुपर्ने माग गरेका थिए । सोही कार्यक्रमका बिच प्रदेश कार्य समितिको कार्यदलले घोषणा गरेको चरणबद्ध आन्दोलनको जानकारी गराइएको थियो । जसमा श्रावण ५ गते प्रदेश १ को राजधानी बिराटनगरमा वृहत जनप्रदर्शन गर्ने लगायतका कार्यक्रमहरु समावेश थिए । प्रदर्शनकारीले पहिचानविनाको प्रदेश नमान्ने चेतावनी समेत दिएका छन् ।