इटहरी : सुनसरीको इटहरीमा आयोजित नि:शुल्क स्वास्थ्य शिविरमा परिक्षण गराएका मध्ये ३७ जनाको आँखाको अप्रेसन गर्नु पर्ने भएको छ ।
द साल्भेसन मिसन, लायन्स क्लब अफ इटहरी माल्वीन जोन र न्यु अधिकारी मेडिकलले संयुक्त रुपमा आयोजना गरेको नि:शुल्क एक दिने स्वास्थ्य शिविरमा परिक्षण गराएका ३ सय ५३ जना मध्ये ३७ जनाको मोतियाविन्दुको अप्रेसन गर्नुपर्ने समस्या देखा परेको हो ।
इटहरी उपमहानगरपालिका वडा नम्बर १ माझी टोलमा आयोजना गरिएको नि:शुल्क स्वास्थ्य शिविरमा रामलाल गोल्छा आँखा अस्पताल र न्यु अधिकारी मेडिकलहरुको प्राविधिक सहयोग रहेको स्वास्थ्य शिविरमा आँखा, सुगर प्रेसर परिक्षण गरिएको थियो । स्वास्थ्य संस्थाहरुको पहुँच सहज नभएका इटहरीका विपन्न परिवारका मानिसहरुलाई स्वास्थ्य उपचार सेवा पुर्याउने उद्धेश्यले नि:शुल्क स्वास्थ्य शिविर राखिएको आयोजक द साल्भेसनका अध्यक्ष मिनकुमार मगरले बताए ।
कोरोना कहरका कारण लामो समय देखि विपन्न वर्गका मानिसहरुलाई स्वास्थ्य सेवाका लागि सञ्चालन हुने गरेका नि:शुल्क आँखा शिविरहरु सञ्चालन हुन नसकिरहेको तर्फ मध्यनजर गर्दै नि:शुल्क आँखा शिविर सञ्चालन गरिएको अर्को आयोजक संस्था लायन्स क्लब अफ इटहरी माल्वीन जोनका अध्यक्ष रितेश श्रेष्ठले बताए ।
नि:शुल्क स्वास्थ्य शिविरमा परिक्षण गराएकाहरुलाई औषधि समेत नि:शुल्क रुपमा प्रदान गरिएको थियो । मोतिया विन्दुको अप्रेसन गर्नु पर्नेहरुलाई रामलाल गोल्छा आँखा अस्पतालमा नि:शुल्क रुपमा गरिने व्यवस्था मिलाइएको द साल्भेसन मिसनका कोषाध्यक्ष निशान लो ले जानकारी दिए ।
सोही अवसरमा स्वास्थ्यसंग सम्बन्धित सिप्ला कम्पनीले श्वास प्रश्वासको अवस्थाको परिक्षण पनि गरि दिएको थियो ।
प्रतिक्रिया दिनुहोस
Copyright © 2019 / 2024 - Newpati.com - All rights reserved
