एजेन्सी : न्युजिल्याण्डलाई ८ विकेटले पराजित गर्दै अस्ट्रेलियाले पहिलोपटक टी–२० विश्वकपको उपाधि जितेको छ ।
युएईमा गएराति भएको फाइनल खेलमा पहिले ब्याटिङ गरेको न्युजिल्याण्डले निर्धारित २० ओभरमा ४ विकेट गुमाएर १ सय ७२ रन बनायो । उसका लागि केन विलियमसनले ८५ रन बनाउँदा अष्ट्रेलियाका जस हेजलउडले ३ विकट लिए ।
१ सय ७३ रनको लक्ष्य पछ्याएको अष्ट्रेलियाले, १९ ओभरमा २ विकेट गुमाएर पुरा गर्यो । अस्ट्रेलियालाई जीत दिलाउन मिचेल मार्सले नटआउट रहँदै ७७ रनको महत्त्वपूर्ण पारी खेले भने डेभिड वार्नरले ५३ रनको योगदान दिए ।
लगातार तीनवटा ५० ओभरको विश्वकप जित्ने पहिलो टिम बनेको अस्ट्रेलियाको लागि यो टी–२० विश्वकपको पहिलो उपाधि हो । यसअघि सन् २०१० मा भएको विश्वकपमा अस्ट्रेलिया इंग्ल्याण्डसँग ७ विकेटले पराजित हुँदै उपाधि चुम्नबाट चुकेको थियो ।
टी–२० विश्वकपको पहिलो फाइनल खेलेको न्युजिल्याण्ड पुन: एकपटक अभागी साबित बनेको छ । यसअघि ५० ओभरको विश्वकप फाइनलमा न्युजिल्याण्ड लगातार दुईपटक पराजित भएको थियो । सन् २०१५ मा अस्ट्रेलिया र सन् २०१९ मा इंग्ल्याण्डसँग हारको सामना गर्नुपरेको थियो ।
प्रतिक्रिया दिनुहोस
Copyright © 2019 / 2024 - Newpati.com - All rights reserved