काठमाण्डाै । पहिलो पटक साफ च्याम्पियनसिपको फाइनलमा पुगेको नेपालले उपाधिका लागि भारतसँग खेल्दैछ । भारतविरुद्ध मैदान उत्रदै गर्दा नेपाली टोलीसँग मुख्य खेलाडी अन्जन विष्ट मैदान बाहिर रहनेछन् । उनी दोहोरो पहेलो कार्डका कारण मैदान बाहिर हुने भएका हुन् । भारतीय टोलीका पनि मुख्य प्रशिक्षकसहित महत्वपूर्ण दुई खेलाडी मैदान बाहिर रहनेछन् ।
सेमिफाइनल खेलमा रातो कार्ड पाएका भारतीय प्रशिक्षक इगोर स्टिमाचले शनिबार हुने फाइनल खेल गुमाउने भएका हुन् । दुई मुख्य खेलाडीले पनि फाइनलमा देखिने छैनन् ।
इगोरले माल्दिभ्सविरुद्ध खेलमा दुई पटक पहेंलो कार्डपछि रातो कार्ड पाएका थिए । भारतका लागि भरपर्दाे डिफेन्डर सुभासिस बोसले पनि फाइनलमा हुने छैनन् । उनले पनि दुई पहेंलो कार्ड पाएका छन् । भारतका फरवार्ड फारुख चौधरी पनि फाइनल खेलमा हुने छैनन् । उनी चोटका कारण मैदान बाहिर रहने बताइएको छ । लिग चरणको खेलमा नेपालमाथि १–० ले भारत विजयी हुँदा फारुखले सुनिल क्षेत्रीलाई बल असिस्ट गरेका थिए ।
नेपालका प्रशिक्षक अब्दुल्लाह अलमुताइरीले पनि दुई पहेलो कार्ड पाएका थिए । श्रीलंका र बंगलादेशसँग पहेंलो कार्ड पाएपनि उनले फाइनल खेल गुमाउने छैनन् । अफिसियलले एकै खेलमा रातो कार्ड पाए मात्रै प्रतिबन्ध लाग्छ । भारतका महत्वपूर्ण दुई खेलाडीसहित प्रशिक्षक मैदान बाहिर रहेकाे फाइदा नेपाली टाेलीले उठाउने छ ।
साफकाे फाइनलमा पहिलाे पटक पुगेकाे नेपाली टाेली उपाधि जित्दै इतिहास रच्ने प्रयासमा छ । साफकाे उपाधि जितिकाे खण्डमा कप्तान किरण चेम्जाेङकाे सपना पनि पुरा हुनेछ । केहीसमयअघि चेम्जाेङले आफ्नाे ठूलाे सपना साफकाे उपाधि उचाल्ने रहेकाे बताएका थिए ।
प्रतिक्रिया दिनुहोस
Copyright © 2019 / 2024 - Newpati.com - All rights reserved