तालिबानले अफगानिस्तानको सत्ता कब्जा गरेपछि त्यहाँको सङ्कट झन् चुलिने अवस्था बनेको छ । आफूअनुकूल नचल्नेहरूमाथि तालिबानले कठोर नीति लिने गरेको छ । आफ्नाविरुद्ध गतिविधि गर्नेको हत्या पनि गर्न थालेको छ । तालिबानले पन्जशिर उपत्यकामा कम्तीमा २० जना सर्वसाधारणको हत्या गरेको छ । पन्जशिरमा नेसनल रेसिस्टेन्स फ्रन्ट (एनआरएफ) र तालिबान लडाकुबीच भिडन्त हुँदै आएको छ ।
भिडियोमा स्थानीय बासिन्दाहरुले ती व्यक्ति सर्वसाधारण रहेको बताएका छन् । पन्जशिरमा त्यसरी कम्तीमा २० जनाको हत्या भएको आफूले पुष्टि गर्न सकेको बिबिसीले उल्लेख गरेको छ । तालिबानले आफ्नाविरुद्धमा रहेका सर्वसाधारणको धमाधम हत्या गरेको थालेको विभिन्न सञ्चारमाध्यमले जनाएका छन् ।
आफू सामान्य पसले रहेको र युद्धसँग कुनै सरोकार नरहेको बताएका अब्दुल सामीको हत्या पनि तालिबानले गरेको छ । उनका दुई सन्तान छन् ।
एनआरएफका लडाकुलाई सिमकार्ड बेचेको आरोपमा तालिबानले उनलाई नियन्त्रणमा लिएर हत्या गरेको हो । उनलाई तालिबानका लडाकुले नियन्त्रणमा लिएको केही दिनपछि हत्या गरी शव घरनजिकै ल्याएर फ्यालिदिएका थिए ।
गम्भीर यातना दिएर उनको हत्या गरेको बताइएको छ । गत अगस्ट १५ मा तालिबानले काबुलसहित अफगानिस्तान नियन्त्रणमा लिएको थियो । तर । पान्जशिर भने कब्जामा लिन सकिरहेका थिएन । गत साता पन्जशिर कब्जा गरेको घोषणा तालिबानले गरे पनि एनआरएफले भने आफ्नोतर्फ युद्ध जारी रहेको जनाएको छ ।
प्रतिक्रिया दिनुहोस
Copyright © 2019 / 2024 - Newpati.com - All rights reserved